Luísa Villalta: Versos da antoloxía “Así vou eu, formando parte”

 

Poemas de Luísa Villalta

Luísa Villalta: Letras Galegas 2024

O meu nome é o da Cidade Alta

nacido onde a luz e o mar se están orixinando

mutuamente

nacín enfrente de min mesma

cando a Pescadería era un leito de sereas

e a serpe demorada na voz dos meus avós

vento dos ventos.

Poema de Luísa Villalta

 

Abrir a boca en ti, onde as estrelas

configuran a constelación dos nosos nomes,

abrandar a vontade que nos puxa

implacabelmente para os extremos opostos

con esa forza de non sermos nen eu ti nen ti eu,

cortar a fita para inaugurar o tempo

no que nos miramos o ollo no ollo multiplicado

como o rio aquel, o suor, o beixo continuado

balizado por latexos que se escapan,

e palabras atadas que nos fican dentro,

para fabricar o xesto de buscar-nos

por debaixo das sombras e os vestidos.

Abrir a boca á escuridade para encontrar o dia.