O 30 de agosto de 1979 falecía na súa casa de Vigo Celso Emilio Ferreiro. O 1 de setembro é soterrado en Celanova

Polos camiños de Cangas

a voz do vento xemía:

ai, que soliña quedaches,

María Soliña.

Nos areales de Cangas

muros de noite se erguían :

ai, que soliña quedaches,

María Soliña.

As ondas do mar de Cangas

acedos ecos traían:

ai, que soliña quedaches,

María Soliña.

As gaivotas sobre Cangas

soños de medo tecían:

ai, que soliña quedaches,

María Soliña

Baixo os tellados de Cangas,

anda un terror de auga fría:

ai, que soliña quedaches,

María Soliña.